ਕੈਲਗਰੀ ਨੂੰ ਹਾਊਸਿੰਗ ਫੰਡ ਵਜੋਂ ਮਿਲੇ 65 ਮਿਲੀਅਨ ਡਾਲਰ

ਕੈਲਗਰੀ, 23 ਅਪ੍ਰੈਲ (ਦੇਸ ਪੰਜਾਬ ਟਾਇਮਜ਼):
ਕੈਲਗਰੀ ਦੀ ਹਾਊਸਿੰਗ ਰਣਨੀਤੀ ਨੂੰ ਵੱਡਾ ਹੁਲਾਰਾ ਦਿੰਦਿਆਂ ਸੰਘੀ ਸਰਕਾਰ ਨੇ ‘ਹਾਊਸਿੰਗ ਐਕਸਲੇਟਰ ਫੰਡ’ (HAF) ਦੀ ਇੱਕ ਹੋਰ ਕਿਸ਼ਤ ਜਾਰੀ ਕਰ ਦਿੱਤੀ ਹੈ। 65 ਮਿਲੀਅਨ ਡਾਲਰ ਤੋਂ ਵੱਧ ਦੀ ਇਹ ਰਾਸ਼ੀ ਸ਼ਹਿਰ ਵਿੱਚ ਘਰਾਂ ਦੀ ਉਸਾਰੀ ਤੇਜ਼ ਕਰਨ ਅਤੇ ਘਣਤਾ ਵਧਾਉਣ ਲਈ ਦਿੱਤੀ ਗਈ ਹੈ। ਮੇਅਰ ਜੇਰੋਮੀ ਫਾਰਕਸ ਨੇ ਦੱਸਿਆ ਕਿ ਕੈਲਗਰੀ ਨੇ ਹੁਣ ਤੱਕ ਚਾਰ ਵਿੱਚੋਂ ਤਿੰਨ ਕਿਸ਼ਤਾਂ ਪ੍ਰਾਪਤ ਕਰ ਲਈਆਂ ਹਨ, ਪਰ ਅਗਲੀ ਅਤੇ ਆਖਰੀ ਕਿਸ਼ਤ ਹਾਸਲ ਕਰਨ ਲਈ ਸ਼ਹਿਰ ਨੂੰ ਸਖ਼ਤ ਸ਼ਰਤਾਂ ਪੂਰੀਆਂ ਕਰਨੀਆਂ ਪੈਣਗੀਆਂ। ਸੰਘੀ ਸਰਕਾਰ ਚਾਹੁੰਦੀ ਹੈ ਕਿ ਸ਼ਹਿਰ ਦੇ ਜ਼ਿਆਦਾਤਰ ਪਲਾਟਾਂ ‘ਤੇ ਘੱਟੋ-ਘੱਟ ਚਾਰ ਯੂਨਿਟ ਬਣਾਉਣ ਦੀ ਇਜਾਜ਼ਤ ਦਿੱਤੀ ਜਾਵੇ।
ਇਸ ਮੁੱਦੇ ‘ਤੇ ਸਿਟੀ ਕੌਂਸਲ ਵਿੱਚ ਕਾਫੀ ਬਹਿਸ ਚੱਲ ਰਹੀ ਹੈ। ਕੌਂਸਲਰ ਆਂਦਰੇ ਚਾਬੋਟ ਅਤੇ ਡੈਨ ਮੈਕਲੀਨ ਨੇ ਸੰਘੀ ਸਰਕਾਰ ਦੀ ਇਸ ਸ਼ਰਤ ‘ਤੇ ਚਿੰਤਾ ਪ੍ਰਗਟਾਈ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਸ਼ਹਿਰ ਨੂੰ ਆਪਣੀਆਂ ਲੋੜਾਂ ਅਨੁਸਾਰ ਫੈਸਲਾ ਲੈਣਾ ਚਾਹੀਦਾ ਹੈ ਨਾ ਕਿ ਸਿਰਫ ਫੰਡਾਂ ਲਈ ਬਿਨਾਂ ਸੋਚੇ-ਸਮਝੇ ਜ਼ੋਨਿੰਗ ਨਿਯਮ ਬਦਲਣੇ ਚਾਹੀਦੇ ਹਨ। ਹਾਲ ਹੀ ਵਿੱਚ ਕੌਂਸਲ ਨੇ ‘ਬਲੈਂਕੇਟ ਰੀਜ਼ੋਨਿੰਗ’ ਦੇ ਫੈਸਲੇ ਨੂੰ ਰੱਦ ਕਰ ਦਿੱਤਾ ਸੀ, ਜਿਸ ਕਾਰਨ ਅਗਲੇਰੀ ਫੰਡਿੰਗ ਵਿੱਚ ਮੁਸ਼ਕਲਾਂ ਆ ਸਕਦੀਆਂ ਹਨ। ਇਹ 4 ਬਿਲੀਅਨ ਡਾਲਰ ਦਾ ਫੈਡਰਲ ਪ੍ਰੋਗਰਾਮ ਹੈ ਜਿਸ ਦਾ ਉਦੇਸ਼ ਦੇਸ਼ ਭਰ ਵਿੱਚ ਰਿਹਾਇਸ਼ੀ ਸੰਕਟ ਨੂੰ ਦੂਰ ਕਰਨਾ ਹੈ।
ਹੁਣ ਕੌਂਸਲ ਨੂੰ ਇਹ ਤੈਅ ਕਰਨਾ ਪਵੇਗਾ ਕਿ ਉਹ ਲੋਕਾਂ ਦੀਆਂ ਚਿੰਤਾਵਾਂ ਅਤੇ ਫੈਡਰਲ ਸ਼ਰਤਾਂ ਵਿਚਾਲੇ ਸੰਤੁਲਨ ਕਿਵੇਂ ਬਣਾਉਂਦੀ ਹੈ।