ਕੈਲਗਰੀ ਵਿੱਚ ਘਰਾਂ ਦੀ ਵਿਕਰੀ ਵਿੱਚ ਗਿਰਾਵਟ

ਕੈਲਗਰੀ, 2 ਮਈ (ਦੇਸ ਪੰਜਾਬ ਟਾਇਮਜ਼):
ਕੈਲਗਰੀ ਵਿੱਚ ਪਿਛਲੇ ਸਾਲ ਦੇ ਮੁਕਾਬਲੇ ਅਪ੍ਰੈਲ ਮਹੀਨੇ ਦੌਰਾਨ ਘਰਾਂ ਦੀ ਵਿਕਰੀ ਵਿੱਚ ਕਮੀ ਦਰਜ ਕੀਤੀ ਗਈ ਹੈ। ਸ਼ਹਿਰ ਦੇ ਰੀਅਲ ਅਸਟੇਟ ਬੋਰਡ ਅਨੁਸਾਰ ਮਕਾਨਾਂ ਦੀ ਸਪਲਾਈ ਵਧਣ ਕਾਰਨ ਖਰੀਦਦਾਰਾਂ ਵਿੱਚ ਪਹਿਲਾਂ ਵਰਗੀ ਕਾਹਲੀ ਨਹੀਂ ਰਹੀ। ਕੈਲਗਰੀ ਰੀਅਲ ਅਸਟੇਟ ਬੋਰਡ ਨੇ ਦੱਸਿਆ ਕਿ ਪਿਛਲੇ ਮਹੀਨੇ ਕੁੱਲ 2,104 ਘਰ ਵਿਕੇ ਹਨ ਜੋ ਪਿਛਲੇ ਸਾਲ ਦੇ ਮੁਕਾਬਲੇ 5.7 ਫੀਸਦੀ ਘੱਟ ਹਨ। ਸ਼ਹਿਰ ਵਿੱਚ ਰਿਹਾਇਸ਼ੀ ਘਰਾਂ ਦੀ ਔਸਤ ਕੀਮਤ ਅਪ੍ਰੈਲ 2025 ਤੋਂ 3.5 ਫੀਸਦੀ ਡਿੱਗ ਕੇ 568,800 ਡਾਲਰ ਰਹਿ ਗਈ ਹੈ। ਬੋਰਡ ਦੀ ਮੁੱਖ ਅਰਥ ਸ਼ਾਸਤਰੀ ਐਨ ਮੈਰੀ ਲੂਰੀ ਦਾ ਕਹਿਣਾ ਹੈ ਕਿ ਬਾਜ਼ਾਰ ਹੁਣ ਵੇਚਣ ਵਾਲਿਆਂ ਦੇ ਪੱਖ ਤੋਂ ਬਦਲ ਕੇ ਵਧੇਰੇ ਸੰਤੁਲਿਤ ਸਥਿਤੀ ਵਿੱਚ ਆ ਗਿਆ ਹੈ। ਹਾਲਾਂਕਿ ਡਿਟੈਚਡ ਮਕਾਨਾਂ ਦੀ ਸਪਲਾਈ ਅਜੇ ਵੀ ਸੀਮਤ ਹੈ ਜਦਕਿ ਕੌਂਡੋ ਬਾਜ਼ਾਰ ਵਿੱਚ ਸਥਿਤੀ ਖਰੀਦਦਾਰਾਂ ਦੇ ਹੱਕ ਵਿੱਚ ਹੈ। ਅਪਾਰਟਮੈਂਟ ਵਰਗੇ ਘਰਾਂ ਦੀਆਂ ਕੀਮਤਾਂ ਵਿੱਚ 8.9 ਫੀਸਦੀ ਦੀ ਕਮੀ ਆਈ ਹੈ ਅਤੇ ਇਹ 301,400 ਡਾਲਰ ਹੋ ਗਈਆਂ ਹਨ। ਇਸੇ ਤਰ੍ਹਾਂ ਰੋਅ ਸਟਾਈਲ ਘਰ 7 ਫੀਸਦੀ ਸਸਤੇ ਹੋ ਕੇ 422,900 ਡਾਲਰ ‘ਤੇ ਆ ਗਏ ਹਨ। ਡਿਟੈਚਡ ਘਰਾਂ ਦੀਆਂ ਕੀਮਤਾਂ 2.7 ਫੀਸਦੀ ਘੱਟ ਕੇ 745,400 ਡਾਲਰ ਰਹਿ ਗਈਆਂ ਹਨ। ਸੈਮੀ ਡਿਟੈਚਡ ਮਕਾਨਾਂ ਦੀ ਕੀਮਤ ਪਿਛਲੇ ਸਾਲ ਅਪ੍ਰੈਲ ਦੇ ਮੁਕਾਬਲੇ 0.3 ਫੀਸਦੀ ਡਿੱਗ ਕੇ 690,200 ਡਾਲਰ ਹੋ ਗਈ ਹੈ। ਅਪ੍ਰੈਲ ਵਿੱਚ ਬਾਜ਼ਾਰ ਵਿੱਚ 3,829 ਨਵੇਂ ਘਰ ਵਿਕਣ ਲਈ ਆਏ ਜਦਕਿ ਕੁੱਲ ਉਪਲਬਧ ਘਰਾਂ ਦੀ ਗਿਣਤੀ ਵੱਧ ਕੇ 5,973 ਹੋ ਗਈ ਹੈ।