ਕੈਲਗਰੀ, 16 ਜੂਨ, (ਦੇਸ ਪੰਜਾਬ ਟਾਈਮਜ਼): ਸਟੈਟਿਸਟਿਕਸ ਕੈਨੇਡਾ ਦੀ ਇੱਕ ਰਿਪੋਰਟ ਅਨੁਸਾਰ ਦਸੰਬਰ 2019 ਤੋਂ ਦਸੰਬਰ 2025 ਦੇ ਵਿਚਕਾਰ ਕੈਨੇਡੀਅਨ ਘਰਾਂ ਦੇ ਬੀਮਾ ਪ੍ਰੀਮੀਅਮ ਵਿੱਚ 45 ਪ੍ਰਤੀਸ਼ਤ ਦਾ ਵਾਧਾ ਹੋਇਆ ਹੈ। ਇਸ ਦੇ ਨਾਲ ਹੀ ਯਾਤਰੀ ਵਾਹਨਾਂ ਦੇ ਬੀਮਾ ਪ੍ਰੀਮੀਅਮ ਵਿੱਚ 23.9 ਪ੍ਰਤੀਸ਼ਤ ਦਾ ਵਾਧਾ ਹੋਇਆ ਹੈ। ਇਸ ਦਾ ਅਹਿਮ ਕਾਰਨ ਖਰਾਬ ਮੌਸਮ ਕਾਰਨ ਹੋਣ ਵਾਲੇ ਨੁਕਸਾਨ ਦੇ ਕਲੇਮ ਹਨ। ਅਧਿਐਨ ਵਿੱਚ ਪਾਇਆ ਗਿਆ ਹੈ ਕਿ 2024 ਵਿੱਚ ਇਹ ਕਲੇਮ 8.6 ਬਿਲੀਅਨ ਡਾਲਰ ਤੱਕ ਪਹੁੰਚ ਗਏ ਸਨ ਜਿਸਨੇ 2016 ਦੇ 6.2 ਬਿਲੀਅਨ ਡਾਲਰ ਦੇ ਪੁਰਾਣੇ ਰਿਕਾਰਡ ਨੂੰ ਤੋੜ ਦਿੱਤਾ ਹੈ। 2024 ਦੀ ਤੀਜੀ ਤਿਮਾਹੀ ਵਿੱਚ 30 ਦਿਨਾਂ ਦੇ ਅੰਦਰ ਕਈ ਗੰਭੀਰ ਘਟਨਾਵਾਂ ਵਾਪਰੀਆਂ ਜਿਨ੍ਹਾਂ ਵਿੱਚ ਕੈਲਗਰੀ ਵਿੱਚ ਗੜੇਮਾਰੀ ਜੈਸਪਰ ਵਿੱਚ ਜੰਗਲੀ ਅੱਗ ਅਤੇ ਕਿਊਬਿਕ ਤੇ ਓਨਟਾਰੀਓ ਵਿੱਚ ਹੜ੍ਹ ਸ਼ਾਮਲ ਹਨ। ਇਹਨਾਂ ਘਟਨਾਵਾਂ ਕਾਰਨ ਬੀਮਾ ਕੰਪਨੀਆਂ ਨੂੰ 23 ਬਿਲੀਅਨ ਡਾਲਰ ਤੋਂ ਵੱਧ ਦਾ ਨੁਕਸਾਨ ਝੱਲਣਾ ਪਿਆ। ਵਾਹਨਾਂ ਦੇ ਬੀਮੇ ਦੀ ਲਾਗਤ ਵੀ ਵਾਹਨਾਂ ਦੀਆਂ ਵਧਦੀਆਂ ਕੀਮਤਾਂ ਮੁਰੰਮਤ ਦੇ ਖਰਚੇ ਅਤੇ ਕਾਰ ਚੋਰੀ ਦੀਆਂ ਘਟਨਾਵਾਂ ਕਾਰਨ ਵਧੀ ਹੈ। ਦਸੰਬਰ 2005 ਤੋਂ ਦਸੰਬਰ 2025 ਤੱਕ ਦੇ 20 ਸਾਲਾਂ ਦੇ ਸਮੇਂ ਵਿੱਚ ਅਲਬਰਟਾ ਵਿੱਚ ਘਰਾਂ ਦੇ ਬੀਮਾ ਪ੍ਰੀਮੀਅਮ ਵਿੱਚ 391.6 ਪ੍ਰਤੀਸ਼ਤ ਦਾ ਭਾਰੀ ਵਾਧਾ ਦਰਜ ਕੀਤਾ ਗਿਆ ਹੈ। ਪਿਛਲੇ 5 ਸਾਲਾਂ ਵਿੱਚ ਅਲਬਰਟਾ ਵਿੱਚ 55.8 ਪ੍ਰਤੀਸ਼ਤ ਵਾਧਾ ਹੋਇਆ ਹੈ। ਇਸ ਖਤਰੇ ਨਾਲ ਨਜਿੱਠਣ ਲਈ ਸੂਬਾ ਸਰਕਾਰ ਨੇ ਇਸ ਸਾਲ ਦੇ ਜੰਗਲੀ ਅੱਗ ਦੇ ਮੌਸਮ ਲਈ 550 ਤੋਂ ਵੱਧ ਫਾਇਰਫਾਈਟਰਾਂ ਦੀ ਭਰਤੀ ਕੀਤੀ ਹੈ।
