ਕੈਲਗਰੀ, 24 ਅਗਸਤ (ਦੇਸ ਪੰਜਾਬ ਟਾਈਮਜ਼): ਅਲਬਰਟਾ ਦੇ ਕੈਨਮੋਰ ਇਲਾਕੇ ਵਿੱਚ ਸਥਿਤ ਰੈਟਸ ਨੈਸਟ ਗੁਫਾ ਵਿੱਚ ਫਸੇ ਇੱਕ ਵਿਅਕਤੀ ਨੂੰ ਸਫਲਤਾਪੂਰਵਕ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ ਹੈ। ਇਹ ਬਚਾਅ ਮੁਹਿੰਮ ਇਸ ਲਈ ਵੀ ਖਾਸ ਰਹੀ ਕਿਉਂਕਿ ਇਸ ਵਿੱਚ ਪਹਿਲੀ ਵਾਰ ਵਾਲੰਟੀਅਰਾਂ ਵੱਲੋਂ ਤਿਆਰ ਕੀਤੀ ਗਈ ਜ਼ਮੀਨਦੋਜ਼ ਰੇਡੀਓ ਤਕਨੀਕ ਦੀ ਵਰਤੋਂ ਕੀਤੀ ਗਈ। ਸਰਚ ਐਂਡ ਰੈਸਕਿਊ ਅਲਬਰਟਾ ਮੁਤਾਬਕ ਇਹ ਵਿਅਕਤੀ ਸ਼ਨੀਵਾਰ ਸਵੇਰੇ 11:30 ਵਜੇ ਗੁਫਾ ਦੇ ਇੱਕ ਬਹੁਤ ਹੀ ਤੰਗ ਹਿੱਸੇ ਵਿੱਚ ਫਸ ਗਿਆ ਸੀ। ਬਚਾਅ ਟੀਮਾਂ ਨੇ ਮੌਕੇ ‘ਤੇ ਪਹੁੰਚ ਕੇ ਪੱਥਰਾਂ ਨੂੰ ਕੱਟਣ ਲਈ ਹੈਮਰ ਡਰਿੱਲਾਂ ਦੀ ਵਰਤੋਂ ਕੀਤੀ। ਇਹ ਪ੍ਰਕਿਰਿਆ ਇੰਨੀ ਔਖੀ ਸੀ ਕਿ ਵਿਅਕਤੀ ਨੂੰ ਬਹੁਤ ਹੌਲੀ ਹੌਲੀ ਖਿਸਕਾ ਕੇ ਬਾਹਰ ਲਿਆਂਦਾ ਗਿਆ। ਅੰਤ ਵਿੱਚ ਰਾਤ 10 ਵਜੇ ਉਸਨੂੰ ਆਜ਼ਾਦ ਕਰਵਾਇਆ ਗਿਆ ਅਤੇ ਉਹ ਅੱਧੀ ਰਾਤ ਦੇ ਕਰੀਬ ਗੁਫਾ ਵਿੱਚੋਂ ਪੂਰੀ ਤਰ੍ਹਾਂ ਬਾਹਰ ਆ ਸਕਿਆ। ਇਸ ਮੁਹਿੰਮ ਵਿੱਚ 13 ਕੇਵ ਰੈਸਕਿਊਅਰ, 10 ਫਾਇਰਫਾਈਟਰ ਅਤੇ 2 ਕਾਨਾਨਾਸਕਿਸ ਮਾਊਂਟੇਨ ਰੈਸਕਿਊ ਮੈਂਬਰ ਸ਼ਾਮਲ ਸਨ। ਇਸ ਦੌਰਾਨ ਵਰਤਿਆ ਗਿਆ ਨਵਾਂ ਰੇਡੀਓ ਸਿਸਟਮ ਕਿਊਡੀਐਕਸ ਐਮ ਤਕਨੀਕ ਉੱਤੇ ਅਧਾਰਤ ਹੈ ਜੋ 500 ਮੀਟਰ ਠੋਸ ਪੱਥਰਾਂ ਦੇ ਆਰ ਪਾਰ ਵੀ ਸੰਪਰਕ ਕਾਇਮ ਰੱਖਣ ਦੇ ਸਮਰੱਥ ਹੈ। ਸਰਚ ਐਂਡ ਰੈਸਕਿਊ ਅਲਬਰਟਾ ਦੇ ਅਧਿਕਾਰੀ ਜੌਨ ਅਲੈਗਜ਼ੈਂਡਰ ਨੇ ਕਿਹਾ ਕਿ ਇਹ ਸਫਲਤਾ ਵਾਲੰਟੀਅਰਾਂ ਦੀ ਮਿਹਨਤ ਅਤੇ ਵੱਖ ਵੱਖ ਏਜੰਸੀਆਂ ਦੇ ਬਿਹਤਰ ਤਾਲਮੇਲ ਦਾ ਨਤੀਜਾ ਹੈ ਜਿਨ੍ਹਾਂ ਨੇ ਇੱਕ ਕੀਮਤੀ ਜਾਨ ਬਚਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਈ ਹੈ।
