ਕੈਲਗਰੀ, 28 ਅਪ੍ਰੈਲ (ਦੇਸ ਪੰਜਾਬ ਟਾਇਮਜ਼): ਕੈਲੀਫੋਰਨੀਆ ਵਿੱਚ ਕਾਰਨੀਵਲ ਕਰੂਜ਼ ਜਹਾਜ਼ ‘ਤੇ ਇੱਕ ਮਹਿਲਾ ਦੀ ਬਾਲਕੋਨੀ ਤੋਂ ਡਿੱਗਣ ਕਾਰਨ ਮੌਤ ਹੋ ਜਾਣ ਦੀ ਦੁਖਦਾਈ ਖ਼ਬਰ ਹੈ। ਕਾਰਨੀਵਲ ਕਰੂਜ਼ ਲਾਈਨ ਮੁਤਾਬਕ ਇਹ ਘਟਨਾ ‘ਕਾਰਨੀਵਲ ਫਿਰੇਂਜ਼ੇ’ ਜਹਾਜ਼ ‘ਤੇ ਵਾਪਰੀ, ਜਿੱਥੇ ਮਹਿਲਾ ਆਪਣੀ ਸਟੇਟਰੂਮ ਦੀ ਬਾਲਕੋਨੀ ਤੋਂ ਹੇਠਾਂ ਡਿੱਗ ਗਈ। ਮਹਿਲਾ ਦੇ ਪਰਿਵਾਰ ਨੇ ਤੁਰੰਤ ਅਮਲੇ ਨੂੰ ਸੂਚਿਤ ਕੀਤਾ, ਪਰ ਉਸ ਦੀ ਜਾਨ ਨਹੀਂ ਬਚਾਈ ਜਾ ਸਕੀ। ਕੰਪਨੀ ਨੇ ਪੀੜਤ ਪਰਿਵਾਰ ਨਾਲ ਹਮਦਰਦੀ ਪ੍ਰਗਟਾਈ ਹੈ।
ਇਸ ਘਟਨਾ ਦੀ ਜਾਂਚ ਲਈ ਕਾਨੂੰਨ ਲਾਗੂ ਕਰਨ ਵਾਲੀਆਂ ਏਜੰਸੀਆਂ ਕੈਟਾਲੀਨਾ ਆਈਲੈਂਡ ‘ਤੇ ਜਹਾਜ਼ ਵਿੱਚ ਸਵਾਰ ਹੋਣਗੀਆਂ। ਜ਼ਿਕਰਯੋਗ ਹੈ ਕਿ ਕਾਰਨੀਵਲ ਕਰੂਜ਼ ਲਾਈਨ ਪਹਿਲਾਂ ਹੀ ਇੱਕ ਹੋਰ ਮੌਤ ਦੇ ਮਾਮਲੇ ਕਾਰਨ ਸੁਰਖੀਆਂ ਵਿੱਚ ਹੈ। ਪਿਛਲੇ ਸਾਲ 18 ਸਾਲਾ ਐਨਾ ਕੈਪਨਰ ਦੀ ਇੱਕ ਹੋਰ ਜਹਾਜ਼ ‘ਤੇ ਮੌਤ ਹੋ ਗਈ ਸੀ, ਜਿਸ ਦੇ ਸਬੰਧ ਵਿੱਚ ਉਸ ਦੇ 16 ਸਾਲਾ ਮਤਰੇਏ ਭਰਾ ਟਿਮੋਥੀ ਹਡਸਨ ‘ਤੇ ਕਤਲ ਅਤੇ ਜਿਨਸੀ ਸ਼ੋਸ਼ਣ ਦੇ ਦੋਸ਼ ਲੱਗੇ ਹਨ।
ਹਡਸਨ ‘ਤੇ ਦੋਸ਼ ਹੈ ਕਿ ਉਸ ਨੇ ਅੰਤਰਰਾਸ਼ਟਰੀ ਪਾਣੀਆਂ ਵਿੱਚ ਆਪਣੀ ਭੈਣ ਦਾ ਗਲਾ ਘੁੱਟ ਕੇ ਕਤਲ ਕਰ ਦਿੱਤਾ ਸੀ। ਇਸ ਮਾਮਲੇ ਦੀ ਸੁਣਵਾਈ ਮਿਆਮੀ ਦੀ ਅਦਾਲਤ ਵਿੱਚ ਚੱਲ ਰਹੀ ਹੈ ਅਤੇ ਜੇਕਰ ਦੋਸ਼ ਸਾਬਤ ਹੋ ਜਾਂਦੇ ਹਨ, ਤਾਂ ਉਸ ਨੂੰ ਉਮਰ ਕੈਦ ਦੀ ਸਜ਼ਾ ਹੋ ਸਕਦੀ ਹੈ। ਇਹਨਾਂ ਘਟਨਾਵਾਂ ਨੇ ਕਰੂਜ਼ ਜਹਾਜ਼ਾਂ ‘ਤੇ ਮੁਸਾਫਰਾਂ ਦੀ ਸੁਰੱਖਿਆ ਨੂੰ ਲੈ ਕੇ ਮੁੜ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।
