[ਕੈਲਗਰੀ] ਕੈਲਗਰੀ, 18 ਮਈ (ਦੇਸ ਪੰਜਾਬ ਟਾਈਮਜ਼): ਫੈਡਰਲ ਅਤੇ ਅਲਬਰਟਾ ਸਰਕਾਰਾਂ ਪੱਛਮੀ ਤੱਟ ਤੱਕ ਇੱਕ ਨਵੀਂ ਤੇਲ ਪਾਈਪਲਾਈਨ ਬਣਾਉਣ ਵੱਲ ਇੱਕ ਕਦਮ ਹੋਰ ਨੇੜੇ ਪਹੁੰਚ ਗਈਆਂ ਹਨ। ਪ੍ਰੀਮੀਅਰ ਡੈਨੀਅਲ ਸਮਿਥ ਇਸ ਪ੍ਰੋਜੈਕਟ ਲਈ ਵਪਾਰਕ ਪੱਖ ਮਜ਼ਬੂਤ ਕਰ ਰਹੇ ਹਨ ਅਤੇ ਵਿਰੋਧੀ ਭਾਵਨਾਵਾਂ ਨੂੰ ਸ਼ਾਂਤ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਅਲਬਰਟਾ ਅਤੇ ਓਟਾਵਾ ਵਿਚਕਾਰ ਹੋਏ ਊਰਜਾ ਸਮਝੌਤੇ ਬਾਰੇ ਵਪਾਰਕ ਭਾਈਚਾਰੇ ਅਤੇ ਵਾਤਾਵਰਣ ਸਮੂਹਾਂ ਦੀ ਮਿਲੀ-ਜੁਲੀ ਪ੍ਰਤੀਕਿਰਿਆ ਸਾਹਮਣੇ ਆਈ ਹੈ। ਇਸ ਪ੍ਰੋਜੈਕਟ ਦੀ ਸਮਾਂ-ਸੀਮਾ ਕਾਫੀ ਸਖਤ ਹੈ। ਅਲਬਰਟਾ ਵੱਲੋਂ 1 ਜੁਲਾਈ ਤੱਕ ਪ੍ਰਸਤਾਵ ਪੇਸ਼ ਕਰਨ ਦੀ ਯੋਜਨਾ ਹੈ ਅਤੇ ਓਟਾਵਾ ਵੱਲੋਂ ਇਸਨੂੰ 1 ਅਕਤੂਬਰ ਤੱਕ ਰਾਸ਼ਟਰੀ ਹਿੱਤ ਦੇ ਪ੍ਰੋਜੈਕਟ ਵਜੋਂ ਪਹਿਲ ਦਿੱਤੇ ਜਾਣ ਦੀ ਉਮੀਦ ਹੈ। ਪ੍ਰੀਮੀਅਰ ਨੇ ਕਿਹਾ ਕਿ ਸਤੰਬਰ 2027 ਤੱਕ ਇਸ ਵਿੱਚੋਂ ਤੇਲ ਦੀ ਢੋਆ-ਢੁਆਈ ਸ਼ੁਰੂ ਨਹੀਂ ਹੋਵੇਗੀ, ਬਲਕਿ ਇਹ ਉਹ ਤਾਰੀਖ ਹੈ ਜਦੋਂ ਉਸਾਰੀ ਦਾ ਕੰਮ ਸ਼ੁਰੂ ਹੋਣ ਦਾ ਟੀਚਾ ਰੱਖਿਆ ਗਿਆ ਹੈ। ਵਪਾਰਕ ਭਾਈਚਾਰਾ ਇਸ ਖ਼ਬਰ ਦਾ ਸਵਾਗਤ ਕਰ ਰਿਹਾ ਹੈ। ਯੂਨੀਵਰਸਿਟੀ ਆਫ਼ ਲੈਥਬ੍ਰਿਜ ਦੇ ਅਰਥ ਸ਼ਾਸਤਰ ਦੇ ਪ੍ਰੋਫੈਸਰ ਨਜ਼ੀਰ ਮੈਮੂਨ ਅਨੁਸਾਰ ਇਸ ਨਾਲ ਸੂਬੇ ਦੀ ਆਰਥਿਕਤਾ ਨੂੰ ਹੁਲਾਰਾ ਮਿਲੇਗਾ ਅਤੇ ਰੁਜ਼ਗਾਰ ਦੇ ਮੌਕੇ ਪੈਦਾ ਹੋਣਗੇ। ਦੂਜੇ ਪਾਸੇ ਵਾਤਾਵਰਣ ਸਮੂਹ ਅਲਬਰਟਾ ਵਿੱਚ ਉਦਯੋਗਿਕ ਕਾਰਬਨ ਨਿਕਾਸੀ ਦੀ ਕੀਮਤ ਬਾਰੇ ਚਿੰਤਤ ਹਨ, ਜੋ 2040 ਤੱਕ 130 ਡਾਲਰ ਪ੍ਰਤੀ ਟਨ ਤੈਅ ਕੀਤੀ ਗਈ ਹੈ ਅਤੇ ਇਹ ਰਾਸ਼ਟਰੀ ਕੀਮਤ ਤੋਂ ਕਾਫੀ ਘੱਟ ਹੈ।
