ਅਲਬਰਟਾ ਦੇ ਕੈਨੇਡਾ ਤੋਂ ਵੱਖ ਹੋਣ ਦੀ ਕੀਮਤ 400 ਬਿਲੀਅਨ ਡਾਲਰ ਹੋ ਸਕਦੀ ਹੈ : ਪ੍ਰੀਮੀਅਰ ਡੈਨੀਅਲ ਸਮਿਥ

ਅਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਅਨੁਮਾਨ ਲਗਾਇਆ ਹੈ ਕਿ ਜੇਕਰ ਸੂਬਾ ਕੈਨੇਡਾ ਤੋਂ ਵੱਖ ਹੁੰਦਾ ਹੈ ਤਾਂ ਇਸਦੇ ਬਦਲਾਅ ਦੀ ਕੀਮਤ ਲਗਭਗ 400 ਬਿਲੀਅਨ ਡਾਲਰ ਹੋਵੇਗੀ। ਇਸ ਤੋਂ ਇਲਾਵਾ ਸਾਲਾਨਾ ਖਰਚਾ 25 ਬਿਲੀਅਨ ਤੋਂ 50 ਬਿਲੀਅਨ ਡਾਲਰ ਦੇ ਵਿਚਕਾਰ ਹੋ ਸਕਦਾ ਹੈ। ਸਮਿਥ ਨੇ ਸੋਮਵਾਰ ਨੂੰ ਕਿਹਾ ਕਿ ਲੋਕਾਂ ਨੂੰ ਸਹੀ ਜਾਣਕਾਰੀ ਦੇਣਾ ਜ਼ਰੂਰੀ ਹੈ ਤਾਂ ਜੋ ਉਹ ਸੋਚ ਸਮਝ ਕੇ ਫੈਸਲਾ ਲੈ ਸਕਣ। ਇਸ ਖਰਚੇ ਵਿੱਚ ਰਾਸ਼ਟਰੀ ਕਰਜ਼ੇ ਵਿੱਚ ਅਲਬਰਟਾ ਦਾ 170 ਬਿਲੀਅਨ ਡਾਲਰ ਦਾ ਹਿੱਸਾ ਸ਼ਾਮਲ ਹੈ ਜਿਸ ਉੱਤੇ ਹਰ ਸਾਲ 10 ਬਿਲੀਅਨ ਡਾਲਰ ਦਾ ਵਿਆਜ ਬਣਦਾ ਹੈ। ਸਰਹੱਦੀ ਕੰਟਰੋਲ ਅਤੇ ਟੈਰਿਫ ਵਰਗੇ ਹੋਰ ਖਰਚੇ ਵੀ ਇਸ ਵਿੱਚ ਸ਼ਾਮਲ ਹਨ।
ਵਿੱਤ ਮੰਤਰੀ ਜੇਸਨ ਨਿਕਸਨ ਵੱਲੋਂ ਇੱਕ ਮੁਕੰਮਲ ਦਸਤਾਵੇਜ਼ ਤਿਆਰ ਕੀਤਾ ਜਾ ਰਿਹਾ ਹੈ ਜੋ ਅਗਸਤ ਤੱਕ ਜਾਰੀ ਹੋਣ ਦੀ ਸੰਭਾਵਨਾ ਹੈ। ਸਮਿਥ ਅਨੁਸਾਰ ਇਹ ਦਸਤਾਵੇਜ਼ ਵੋਟਿੰਗ ਤੋਂ ਪਹਿਲਾਂ ਜਾਰੀ ਕੀਤਾ ਜਾਵੇਗਾ ਤਾਂ ਜੋ ਲੋਕ ਇਸਨੂੰ ਪੜ੍ਹ ਸਕਣ। ਦੂਜੇ ਪਾਸੇ ਸਟੇਅ ਫਰੀ ਅਲਬਰਟਾ ਦੇ ਮੁੱਖ ਵਕੀਲ ਜੈਫਰੀ ਰਥ ਨੇ ਸਰਕਾਰ ਦੇ ਇਸ ਅਨੁਮਾਨ ਨੂੰ ਗਲਤ ਕਰਾਰ ਦਿੱਤਾ ਹੈ। ਉਹਨਾਂ ਦਾ ਕਹਿਣਾ ਹੈ ਕਿ ਇਹ ਅੰਕੜੇ ਸਿਰਫ ਲੋਕਾਂ ਨੂੰ ਡਰਾਉਣ ਲਈ ਪੇਸ਼ ਕੀਤੇ ਗਏ ਹਨ। ਅਲਬਰਟਾ ਪ੍ਰੋਸਪੈਰਿਟੀ ਪ੍ਰੋਜੈਕਟ ਨੇ ਆਪਣੀ ਯੋਜਨਾ ਵਿੱਚ ਬਦਲਾਅ ਦਾ ਖਰਚਾ ਸਿਰਫ 6 ਬਿਲੀਅਨ ਡਾਲਰ ਦੱਸਿਆ ਹੈ।
ਅਲਬਰਟਾ ਦੇ ਲੋਕ 19 ਅਕਤੂਬਰ ਨੂੰ ਹੋਣ ਵਾਲੀ ਰਾਏਸ਼ੁਮਾਰੀ ਵਿੱਚ ਹਿੱਸਾ ਲੈਣਗੇ ਜਿੱਥੇ ਉਹ ਫੈਸਲਾ ਕਰਨਗੇ ਕਿ ਕੀ ਸੂਬੇ ਨੂੰ ਕੈਨੇਡਾ ਦਾ ਹਿੱਸਾ ਰਹਿਣਾ ਚਾਹੀਦਾ ਹੈ ਜਾਂ ਵੱਖ ਹੋਣ ਦੀ ਪ੍ਰਕਿਰਿਆ ਸ਼ੁਰੂ ਕਰਨੀ ਚਾਹੀਦੀ ਹੈ। ਯੂਨੀਵਰਸਿਟੀ ਆਫ ਕੈਲਗਰੀ ਦੇ ਅਰਥਸ਼ਾਸਤਰੀ ਟ੍ਰੇਵਰ ਟੋਂਬੇ ਅਨੁਸਾਰ ਵਪਾਰਕ ਰੁਕਾਵਟਾਂ ਕਾਰਨ ਅਲਬਰਟਾ ਦੀ ਆਰਥਿਕਤਾ ਨੂੰ ਸਾਲਾਨਾ 30 ਬਿਲੀਅਨ ਡਾਲਰ ਦਾ ਨੁਕਸਾਨ ਹੋ ਸਕਦਾ ਹੈ। ਉਹਨਾਂ ਨੇ ਇਸ ਸਥਿਤੀ ਦੀ ਤੁਲਨਾ ਬ੍ਰਿਟੇਨ ਦੇ ਬ੍ਰੈਗਜ਼ਿਟ ਨਾਲ ਕੀਤੀ ਜਿੱਥੇ ਨਿਵੇਸ਼ ਵਿੱਚ ਭਾਰੀ ਗਿਰਾਵਟ ਆਈ ਸੀ।