ਅਲਬਰਟਾ ਵਿੱਚ ਵੱਖਵਾਦ ਦੀ ਲਹਿਰ ਤੇਜ਼ਕਿਊਬੈਕ ਨੂੰ ਵੀ ਪਿੱਛੇ ਛੱਡਿਆ, 9 ਅਕਤੂਬਰ ਨੂੰ ਹੋਵੇਗਾ ਅਹਿਮ ਜਨਮਤ ਸੰਗ੍ਰਹਿ

ਕੈਲਗਰੀ, 27 ਫਰਵਰੀ (ਦੇਸ ਪੰਜਾਬ ਟਾਇਮਜ਼):
ਇੱਕ ਨਵੇਂ ਅਤੇ ਹੈਰਾਨੀਜਨਕ ਸਰਵੇਖਣ ਵਿੱਚ ਇਹ ਸਾਹਮਣੇ ਆਇਆ ਹੈ ਕਿ ਅਲਬਰਟਾ ਦੇ 1 ਚੌਥਾਈ ਤੋਂ ਵੱਧ ਲੋਕਾਂ ਦਾ ਮੰਨਣਾ ਹੈ ਕਿ ਕੈਨੇਡਾ ਤੋਂ ਵੱਖ ਹੋਣ ਲਈ ਕਰਵਾਇਆ ਗਿਆ ਜਨਮਤ ਸੰਗ੍ਰਹਿ ਸਫਲ ਹੋ ਸਕਦਾ ਹੈ। ਕੈਨੇਡਾ ਪਲਸ ਇਨਸਾਈਟਸ ਦੁਆਰਾ ਕੀਤੇ ਗਏ ਇਸ ਅਧਿਐਨ ਅਨੁਸਾਰ ਅਲਬਰਟਾ ਦੇ 27% ਨਿਵਾਸੀਆਂ ਨੂੰ ਇਹ ਵਿਸ਼ਵਾਸ ਹੈ ਕਿ ਸੂਬੇ ਦੀ ਪ੍ਰਭੂਸੱਤਾ ਇੱਕ ਹਕੀਕਤ ਬਣ ਸਕਦੀ ਹੈ। ਇਹ ਅੰਕੜਾ ਕੈਨੇਡਾ ਦੇ ਕਿਸੇ ਵੀ ਹੋਰ ਸੂਬੇ ਦੇ ਮੁਕਾਬਲੇ ਸਭ ਤੋਂ ਵੱਧ ਹੈ। ਇੱਥੋਂ ਤੱਕ ਕਿ ਇਹ ਕਿਊਬੈਕ ਤੋਂ ਵੀ ਅੱਗੇ ਨਿਕਲ ਗਿਆ ਹੈ ਜਿੱਥੇ ਸਿਰਫ਼ 25% ਲੋਕ ਅਜਿਹੀ ਸਫਲਤਾ ਦੀ ਉਮੀਦ ਰੱਖਦੇ ਹਨ। ਇਹ ਸਰਵੇਖਣ ਦਰਸਾਉਂਦਾ ਹੈ ਕਿ ਅਲਬਰਟਾ ਵਿੱਚ ਮੌਜੂਦਾ ਸਿਆਸੀ ਮਾਹੌਲ ਅਤੇ ਫੈਡਰਲ ਸਰਕਾਰ ਪ੍ਰਤੀ ਨਾਰਾਜ਼ਗੀ ਕਿੰਨੀ ਡੂੰਘੀ ਹੋ ਚੁੱਕੀ ਹੈ। ਹਾਲਾਂਕਿ ਅਲਬਰਟਾ ਅਤੇ ਕਿਊਬੈਕ ਵਿੱਚ ਵੱਖ ਹੋਣ ਦੀ ਚਰਚਾ ਚੱਲ ਰਹੀ ਹੈ ਪਰ ਕੈਨੇਡਾ ਦੇ ਬਾਕੀ ਹਿੱਸਿਆਂ ਵਿੱਚ ਸਥਿਤੀ ਬਿਲਕੁਲ ਵੱਖਰੀ ਹੈ। ਸਰਵੇਖਣ ਅਨੁਸਾਰ ਇਹਨਾਂ ਦੋਵਾਂ ਸੂਬਿਆਂ ਤੋਂ ਬਾਹਰ ਰਹਿਣ ਵਾਲੇ 87% ਕੈਨੇਡੀਅਨ ਅੱਜ ਵੀ ਕੈਨੇਡਾ ਵਿੱਚ ਰਹਿਣ ਨੂੰ ਹੀ ਤਰਜੀਹ ਦਿੰਦੇ ਹਨ। ਕੈਨੇਡਾ ਦੀ ਅਖੰਡਤਾ ਲਈ ਸਭ ਤੋਂ ਮਜ਼ਬੂਤ ਸਮਰਥਨ ਓਨਟਾਰੀਓ ਵਿੱਚ 95% ਅਤੇ ਐਟਲਾਂਟਿਕ ਕੈਨੇਡਾ ਵਿੱਚ 94% ਦੇਖਿਆ ਗਿਆ ਹੈ। ਜੇਕਰ ਸਮੁੱਚੇ ਕੈਨੇਡਾ ਦੀ ਰਾਏ ਲਈ ਜਾਵੇ ਤਾਂ ਸਿਰਫ਼ 5 ਵਿੱਚੋਂ 1 ਕੈਨੇਡੀਅਨ ਯਾਨੀ ਲਗਭਗ 20% ਲੋਕਾਂ ਨੂੰ ਹੀ ਇਹ ਲੱਗਦਾ ਹੈ ਕਿ ਜੇਕਰ ਅਗਲੇ 6 ਮਹੀਨਿਆਂ ਵਿੱਚ ਅਲਬਰਟਾ ਜਾਂ ਕਿਊਬੈਕ ਵਿੱਚ ਕੋਈ ਜਨਮਤ ਸੰਗ੍ਰਹਿ ਕਰਵਾਇਆ ਜਾਂਦਾ ਹੈ ਤਾਂ ਉਹ ਪਾਸ ਹੋ ਜਾਵੇਗਾ। ਪੋਲਸਟਰ ਜੌਨ ਰਾਈਟ ਨੇ ਇਸ ਸਥਿਤੀ ਉੱਤੇ ਚਾਨਣ ਪਾਉਂਦਿਆਂ ਕਿਹਾ ਕਿ ਭਾਵੇਂ ਨੇੜਲੇ ਭਵਿੱਖ ਵਿੱਚ ਅਲਬਰਟਾ ਜਾਂ ਕਿਊਬੈਕ ਵਿੱਚ ਵੱਖ ਹੋਣ ਬਾਰੇ ਕੋਈ ਰਸਮੀ ਵੋਟਿੰਗ ਨਹੀਂ ਹੋ ਰਹੀ ਹੈ ਪਰ ਉਹ ਇਹ ਜਾਣਨਾ ਚਾਹੁੰਦੇ ਸਨ ਕਿ ਜੇਕਰ ਕੈਨੇਡੀਅਨਾਂ ਦੇ ਸਾਹਮਣੇ ਅਜਿਹਾ ਬੈਲਟ ਪੇਪਰ ਰੱਖਿਆ ਜਾਵੇ ਤਾਂ ਉਹ ਕੀ ਮਹਿਸੂਸ ਕਰਨਗੇ।
ਅਲਬਰਟਾ ਦੀ ਸਥਿਤੀ ਇਸ ਲਈ ਵੀ ਚਰਚਾ ਵਿੱਚ ਹੈ ਕਿਉਂਕਿ ਸੂਬਾਈ ਸਰਕਾਰ ਨੇ ਹਾਲ ਹੀ ਵਿੱਚ 9 ਅਕਤੂਬਰ ਨੂੰ ਕਈ ਅਹਿਮ ਮੁੱਦਿਆਂ ਉੱਤੇ ਜਨਮਤ ਸੰਗ੍ਰਹਿ ਕਰਵਾਉਣ ਦਾ ਐਲਾਨ ਕੀਤਾ ਹੈ। ਇਹ ਵੋਟਿੰਗ ਕੈਨੇਡਾ ਦੇ ਸੰਘੀ ਢਾਂਚੇ ਵਿੱਚ ਅਲਬਰਟਾ ਦੀ ਸਥਿਤੀ ਨੂੰ ਮੁੜ ਪਰਿਭਾਸ਼ਿਤ ਕਰਨ ਦੀ ਦਿਸ਼ਾ ਵਿੱਚ ਇੱਕ ਵੱਡਾ ਕਦਮ ਮੰਨੀ ਜਾ ਰਹੀ ਹੈ।