ਸਾਸਕੈਚਵਨ ‘ਚ ਬੈੱਲ ਦੇ ਡਾਟਾ ਸੈਂਟਰ ਖ਼ਿਲਾਫ਼ ਰੋਸ, 4 ਨੇ ਛੱਡੀ ਕੁਰਸੀ

ਕੈਲਗਰੀ, 14 ਅਪ੍ਰੈਲ (ਦੇਸ ਪੰਜਾਬ ਟਾਇਮਜ਼):
ਸਾਸਕੈਚਵਨ ਦੇ ਸ਼ੇਰਵੁੱਡ ਖੇਤਰ ਵਿੱਚ ਬੈੱਲ ਕੰਪਨੀ ਦੇ ਪ੍ਰਸਤਾਵਿਤ ਆਰਟੀਫਿਸ਼ੀਅਲ ਇੰਟੈਲੀਜੈਂਸ ਡਾਟਾ ਸੈਂਟਰ ਨੂੰ ਲੈ ਕੇ ਸਥਾਨਕ ਜ਼ਮੀਨ ਮਾਲਕਾਂ ਦੀ ਚਿੰਤਾਵਾਂ ਨੇ ਰਾਜਨੀਤਿਕ ਸੰਕਟ ਦਾ ਰੂਪ ਲੈ ਲਿਆ ਹੈ। ਸੱਤ ਪਰਿਵਾਰ ਜੋ ਪ੍ਰਸਤਾਵਿਤ ਥਾਂ ਦੇ ਬਿਲਕੁਲ ਨੇੜੇ ਰਹਿੰਦੇ ਹਨ, ਨੇ ਦੋਸ਼ ਲਾਇਆ ਹੈ ਕਿ ਉਨ੍ਹਾਂ ਦੀਆਂ ਚਿੰਤਾਵਾਂ ਨੂੰ ਟਾਲਿਆ ਜਾ ਰਿਹਾ ਹੈ। ਸ਼ੇਰਵੁੱਡ ਦੇ ਆਰ.ਐਮ. ਕੌਂਸਲ ਨੂੰ ਲਿਖੀ ਚਿੱਠੀ ਵਿੱਚ ਇਨ੍ਹਾਂ ਪਰਿਵਾਰਾਂ ਨੇ ਲਿਖਿਆ ਹੈ ਕਿ ਹਰ ਪੜਾਅ ‘ਤੇ ਉਨ੍ਹਾਂ ਦੀਆਂ ਚਿੰਤਾਵਾਂ ਨੂੰ ਟਾਲ ਦਿੱਤਾ, ਘਟਾ ਦਿੱਤਾ ਜਾਂ ਅਣਡਿੱਠ ਕੀਤਾ ਗਿਆ ਹੈ। ਡੱਗ ਮੈਕਕੈੱਲ ਦਾ ਪਰਿਵਾਰ ਲਗਭਗ 150 ਸਾਲਾਂ ਤੋਂ ਇਸ ਖੇਤਰ ਵਿੱਚ ਰਹਿ ਰਿਹਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਸ਼ੇਰਵੁੱਡ ਆਰ.ਐਮ. ਤੋਂ ਜਵਾਬ ਪ੍ਰਾਪਤ ਕਰਨਾ ਬਹੁਤ ਔਖਾ ਰਿਹਾ ਹੈ। ਸਮੂਹ ਨੇ ਦੱਸਿਆ ਕਿ ਜਨਵਰੀ ਤੋਂ ਮਾਰਚ 2026 ਦਰਮਿਆਨ ਉਨ੍ਹਾਂ ਨੇ ਸ਼ੋਰ, ਰੋਸ਼ਨੀ, ਡਰੇਨੇਜ, ਧਰਤੀ ਹੇਠਲੇ ਪਾਣੀ ਦੀ ਸੁਰੱਖਿਆ ਅਤੇ ਸੜਕ ਪ੍ਰਬੰਧਨ ਸਬੰਧੀ ਚਾਰ ਰਸਮੀ ਬੇਨਤੀਆਂ ਜਮ੍ਹਾਂ ਕਰਵਾਈਆਂ। ਪਹਿਲੀ ਬੇਨਤੀ ਤੋਂ ਇਲਾਵਾ ਬਾਕੀ ਤਿੰਨ ਨੂੰ ਕਦੇ ਵੀ ਜਨਤਕ ਰਿਕਾਰਡ ‘ਤੇ ਨਹੀਂ ਪਾਇਆ ਗਿਆ। ਜਦੋਂ ਜਵਾਬ ਨਹੀਂ ਮਿਲੇ ਤਾਂ ਮੈਕਕੈੱਲ ਅਤੇ ਹੋਰਾਂ ਨੇ 25 ਫਰਵਰੀ ਨੂੰ ਓਮਬਡਸਮੈਨ ਕੋਲ ਰਸਮੀ ਸ਼ਿਕਾਇਤ ਦਰਜ ਕਰਵਾਈ। ਹੈਰਾਨੀਜਨਕ ਤੌਰ ‘ਤੇ 18 ਮਾਰਚ ਨੂੰ ਰੀਵ ਅਤੇ ਡਿਪਟੀ ਰੀਵ ਸਮੇਤ ਸੱਤ ਵਿੱਚੋਂ ਚਾਰ ਕੌਂਸਲ ਮੈਂਬਰਾਂ ਨੇ ਅਚਾਨਕ ਅਸਤੀਫ਼ਾ ਦੇ ਦਿੱਤਾ।
ਕੋਈ ਕਾਰਨ ਨਹੀਂ ਦੱਸਿਆ ਗਿਆ।