ਅਲਬਰਟਾ ‘ਚ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀ ਗਿਣਤੀ ਘਟੀ ਕਾਲਜਾਂ ਅਤੇ ਯੂਨੀਵਰਸਿਟੀਆਂ ਗਹਿਰਾਇਆ ਸੰਕਟ

ਕੈਲਗਰੀ, 18 ਅਪ੍ਰੈਲ (ਦੇਸ ਪੰਜਾਬ ਟਾਇਮਜ਼):
ਸਦਰਨ ਅਲਬਰਟਾ ਇੰਸਟੀਚਿਊਟ ਆਫ਼ ਟੈਕਨੋਲੋਜੀ ਨੂੰ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀ ਗਿਣਤੀ ਵਿੱਚ ਕਮੀ ਕਾਰਨ ਗੰਭੀਰ ਫੰਡਿੰਗ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਇਸ ਦੇ ਨਾਲ ਹੀ ਅਲਬਰਟਾ ਸਰਕਾਰ ਨੇ ਘਰੇਲੂ ਵਿਦਿਆਰਥੀਆਂ ਲਈ ਟਿਊਸ਼ਨ ਅਤੇ ਫੀਸਾਂ ਵਿੱਚ ਵਾਧੇ ‘ਤੇ ਦੋ ਪ੍ਰਤੀਸ਼ਤ ਦੀ ਸੀਮਾ ਲਗਾ ਦਿੱਤੀ ਹੈ।
2025 ਦੇ ਮਾਹਿਰ ਪੈਨਲ ਮੁਤਾਬਿਕ, 2018-19 ਸਕੂਲੀ ਸਾਲ ਵਿੱਚ ਵਿਦਿਆਰਥੀ ਟਿਊਸ਼ਨ ਅਤੇ ਫੀਸਾਂ ਅਲਬਰਟਾ ਦੇ ਕਾਲਜਾਂ ਅਤੇ ਯੂਨੀਵਰਸਿਟੀਆਂ ਦੇ ਕੁੱਲ ਮਾਲੀਏ ਦਾ 23 ਪ੍ਰਤੀਸ਼ਤ ਸੀ। ਇਹ 2023-24 ਸਕੂਲੀ ਸਾਲ ਦੌਰਾਨ 31 ਪ੍ਰਤੀਸ਼ਤ ਤੱਕ ਵਧ ਗਿਆ ਕਿਉਂਕਿ ਉਸੇ ਸਮੇਂ ਦੌਰਾਨ ਸੂਬਾਈ ਫੰਡਿੰਗ 10 ਪ੍ਰਤੀਸ਼ਤ ਘੱਟ ਗਈ।
ਅਲਬਰਟਾ ਦੀਆਂ ਬਹੁਤ ਸਾਰੀਆਂ ਉੱਚ ਸਿੱਖਿਆ ਸੰਸਥਾਵਾਂ ਵਾਂਗ, ਐੱਸ.ਏ.ਆਈ.ਟੀ. ਵੀ ਸਰਕਾਰੀ ਫੰਡਿੰਗ ਵਿੱਚ ਕਟੌਤੀ ਦੀ ਪੂਰਤੀ ਲਈ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੇ ਦਾਖਲੇ ਤੋਂ ਮਿਲਣ ਵਾਲੇ ਫੰਡਾਂ ‘ਤੇ ਨਿਰਭਰ ਹੋ ਗਈ ਸੀ। 2025 ਦੇ ਮਾਹਿਰ ਪੈਨਲ ਮੁਤਾਬਿਕ, ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੁਆਰਾ ਭੁਗਤਾਨ ਕੀਤੀ ਟਿਊਸ਼ਨ ਅਤੇ ਫੀਸਾਂ ਦੀ ਮਾਤਰਾ 2020-21 ਵਿੱਚ 36.2 ਕਰੋੜ ਡਾਲਰ ਤੋਂ ਵੱਧ ਕੇ 2023-24 ਵਿੱਚ 67 ਕਰੋੜ ਡਾਲਰ ਹੋ ਗਈ।
ਹਾਲਾਂਕਿ, ਫੈਡਰਲ ਸਰਕਾਰ ਨੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਲਈ ਜਾਰੀ ਕੀਤੇ ਜਾ ਰਹੇ ਪਰਮਿਟਾਂ ਦੀ ਗਿਣਤੀ ਘਟਾ ਕੇ 2024 ਵਿੱਚ 10 ਲੱਖ ਤੋਂ ਵੱਧ ਤੋਂ ਸਤੰਬਰ 2025 ਤੱਕ ਲਗਭਗ 7.25 ਲੱਖ ਕਰ ਦਿੱਤੀ ਹੈ।