ਮਾਰਚ ਮਹੀਨੇ ਵਿੱਚ 1.8 ਬਿਲੀਅਨ ਡਾਲਰ ਦਾ ਵਪਾਰ ਸਰਪਲੱਸ

ਕੈਲਗਰੀ, 5 ਮਈ (ਦੇਸ ਪੰਜਾਬ ਟਾਈਮਜ਼): ਸਟੈਟਿਸਟਿਕਸ ਕੈਨੇਡਾ ਅਨੁਸਾਰ ਦੇਸ਼ ਨੇ ਮਾਰਚ ਮਹੀਨੇ ਵਿੱਚ 1.8 ਬਿਲੀਅਨ ਡਾਲਰ ਦਾ ਵਪਾਰ ਸਰਪਲੱਸ ਦਰਜ ਕੀਤਾ ਹੈ। ਸਤੰਬਰ ਤੋਂ ਬਾਅਦ ਇਹ ਪਹਿਲਾ ਵਪਾਰਕ ਸਰਪਲੱਸ ਹੈ। ਫਰਵਰੀ ਮਹੀਨੇ ਵਿੱਚ 5.1 ਬਿਲੀਅਨ ਡਾਲਰ ਦਾ ਘਾਟਾ ਦਰਜ ਕੀਤਾ ਗਿਆ ਸੀ। ਇਹ ਮੁਨਾਫਾ ਬਰਾਮਦ ਵਿੱਚ 8.5 ਫੀਸਦੀ ਦੇ ਵਾਧੇ ਕਾਰਨ ਹੋਇਆ ਹੈ। ਮਾਰਚ ਵਿੱਚ ਕੁੱਲ ਬਰਾਮਦ 72.8 ਬਿਲੀਅਨ ਡਾਲਰ ਰਹੀ ਜੋ ਜਨਵਰੀ 2025 ਤੋਂ ਬਾਅਦ ਸਭ ਤੋਂ ਵੱਧ ਹੈ। ਇਸ ਵਾਧੇ ਵਿੱਚ ਸੋਨੇ ਦੀ ਬਰਾਮਦ ਅਤੇ ਤੇਲ ਦੀਆਂ ਉੱਚੀਆਂ ਕੀਮਤਾਂ ਦਾ ਵੱਡਾ ਯੋਗਦਾਨ ਰਿਹਾ। ਧਾਤਾਂ ਅਤੇ ਗੈਰ ਧਾਤੂ ਖਣਿਜ ਉਤਪਾਦਾਂ ਦੀ ਬਰਾਮਦ 24.0 ਫੀਸਦੀ ਵੱਧ ਕੇ 15.3 ਬਿਲੀਅਨ ਡਾਲਰ ਹੋ ਗਈ ਹੈ। ਇਸੇ ਤਰ੍ਹਾਂ ਊਰਜਾ ਉਤਪਾਦਾਂ ਦੀ ਬਰਾਮਦ ਵੀ 15.6 ਫੀਸਦੀ ਦੇ ਵਾਧੇ ਨਾਲ 17.1 ਬਿਲੀਅਨ ਡਾਲਰ ਤੱਕ ਪਹੁੰਚ ਗਈ ਹੈ। ਦੂਜੇ ਪਾਸੇ ਮਾਰਚ ਵਿੱਚ ਦਰਾਮਦ 1.6 ਫੀਸਦੀ ਘੱਟ ਕੇ 71.0 ਬਿਲੀਅਨ ਡਾਲਰ ਰਹਿ ਗਈ। ਖਪਤਕਾਰ ਵਸਤਾਂ ਦੀ ਦਰਾਮਦ ਵਿੱਚ ਵੀ 3.9 ਫੀਸਦੀ ਦੀ ਗਿਰਾਵਟ ਆਈ ਹੈ। ਆਕਾਰ ਪੱਖੋਂ ਦੇਖਿਆ ਜਾਵੇ ਤਾਂ ਬਰਾਮਦ ਵਿੱਚ 0.3 ਫੀਸਦੀ ਅਤੇ ਦਰਾਮਦ ਵਿੱਚ 2.0 ਫੀਸਦੀ ਦੀ ਕਮੀ ਦਰਜ ਕੀਤੀ ਗਈ ਹੈ।