ਕੈਲਗਰੀ, 23 ਜੂਨ (ਦੇਸ ਪੰਜਾਬ ਟਾਈਮਜ਼): ਕੈਲਗਰੀ ਵਿੱਚ ਇੱਕ ਡਰਾਈਵਰ ਨੂੰ ਆਈ ਮੈਡੀਕਲ ਐਮਰਜੈਂਸੀ ਕਾਰਨ ਵਾਪਰੇ ਹਾਦਸੇ ਵਿੱਚ ਇੱਕ 60 ਸਾਲਾ ਸਾਈਕਲ ਸਵਾਰ ਦੀ ਮੌਤ ਹੋ ਗਈ। ਕੈਲਗਰੀ ਪੁਲਿਸ ਅਨੁਸਾਰ ਇਹ ਘਟਨਾ ਦੁਪਹਿਰ 1:35 ਵਜੇ ਵਾਪਰੀ ਜਦੋਂ ਇੱਕ 70 ਸਾਲਾ ਬਜ਼ੁਰਗ ਆਪਣੀ ਫੋਰਡ ਐਸਕੇਪ (Ford Escape) ਗੱਡੀ ਵਿੱਚ ਸੈਂਟਰ ਸਟਰੀਟ ‘ਤੇ ਜਾ ਰਿਹਾ ਸੀ। ਪੁਲਿਸ ਦਾ ਮੰਨਣਾ ਹੈ ਕਿ ਡਰਾਈਵਰ ਨੂੰ ਕੋਈ ਡਾਕਟਰੀ ਸਮੱਸਿਆ (ਮੈਡੀਕਲ ਇਵੈਂਟ) ਆਈ, ਜਿਸ ਕਾਰਨ ਗੱਡੀ ਫੁੱਟਪਾਥ ਵੱਲ ਚਲੀ ਗਈ ਅਤੇ ਉਸਨੇ ਉੱਤਰ ਵੱਲ ਜਾ ਰਹੇ ਸਾਈਕਲ ਸਵਾਰ ਨੂੰ ਟੱਕਰ ਮਾਰ ਦਿੱਤੀ। ਹਾਦਸੇ ਦੌਰਾਨ ਡਰਾਈਵਰ ਸਾਈਕਲ ਸਵਾਰ ਨੂੰ ਘਸੀਟਦਾ ਹੋਇਆ ਇੱਕ ਬੱਸ ਸਟਾਪ ਦੇ ਬੋਰਡ ਨਾਲ ਜਾ ਟਕਰਾਇਆ। ਫਿਰ ਸੜਕ ‘ਤੇ ਵਾਪਸ ਆ ਕੇ ਉਸਦੀ ਗੱਡੀ ਟੋਯੋਟਾ ਹਾਈਲੈਂਡਰ (Toyota Highlander) ਨਾਲ ਟਕਰਾਈ, ਜੋ ਅੱਗੇ ਸ਼ੈਵਰਲੇਟ ਸਿਲਵੇਰਾਡੋ (Chevrolet Silverado) ਨਾਲ ਜਾ ਵੱਜੀ। ਅੱਗੇ ਵਧਦਿਆਂ ਇਸ ਗੱਡੀ ਨੇ ਇੱਕ 60 ਸਾਲਾ ਪੈਦਲ ਯਾਤਰੀ ਨੂੰ ਟੱਕਰ ਮਾਰੀ ਅਤੇ ਅੰਤ ਵਿੱਚ ਇੱਕ ਖੰਭੇ ਨਾਲ ਟਕਰਾ ਕੇ ਰੁਕ ਗਈ। ਸਾਈਕਲ ਸਵਾਰ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ, ਜਦਕਿ ਡਰਾਈਵਰ ਨੂੰ ਗੰਭੀਰ ਹਾਲਤ ਵਿੱਚ ਹਸਪਤਾਲ ਦਾਖਲ ਕਰਵਾਇਆ ਗਿਆ ਹੈ। ਪੈਦਲ ਯਾਤਰੀ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ। ਪੁਲਿਸ ਅਨੁਸਾਰ ਇਸ ਹਾਦਸੇ ਵਿੱਚ ਨਸ਼ੇ ਜਾਂ ਤੇਜ਼ ਰਫਤਾਰ ਦਾ ਕੋਈ ਸਬੂਤ ਨਹੀਂ ਹੈ, ਬਲਕਿ ਮੈਡੀਕਲ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।
