ਕੈਲਗਰੀ, 27 ਜੂਨ (ਦੇਸ ਪੰਜਾਬ ਟਾਈਮਜ਼): ਕੈਲਗਰੀ ਦੇ ਇੱਕ ਨਿਵਾਸੀ ਨੇ ਸਟਰੀਟ ਸਵੀਪਿੰਗ ਦੌਰਾਨ ਲਗਾਈ ਗਈ ਪਾਰਕਿੰਗ ਟਿਕਟ ਨੂੰ ਲੈ ਕੇ ਸ਼ਹਿਰ ਦੇ ਨਿਯਮਾਂ ‘ਤੇ ਸਵਾਲ ਖੜ੍ਹੇ ਕੀਤੇ ਹਨ। ਬ੍ਰੈਡ ਮੈਕਡੂਗਲ ਨਾਮਕ ਨਿਵਾਸੀ ਦਾ ਕਹਿਣਾ ਹੈ ਕਿ ਉਸ ਨੇ ਨਿਯਮਾਂ ਦੀ ਪਾਲਣਾ ਕੀਤੀ ਸੀ, ਫਿਰ ਵੀ ਉਸ ਨੂੰ 80 ਡਾਲਰ ਦਾ ਜੁਰਮਾਨਾ ਭਰਨਾ ਪਿਆ। ਸ਼ਹਿਰ ਵੱਲੋਂ ਇਸ ਸਾਲ ਹੁਣ ਤੱਕ ਲਗਭਗ 39 ਹਜ਼ਾਰ ਟਿਕਟਾਂ ਜਾਰੀ ਕੀਤੀਆਂ ਜਾ ਚੁੱਕੀਆਂ ਹਨ। ਮੈਕਡੂਗਲ ਅਨੁਸਾਰ ਸਟਰੀਟ ਸਵੀਪਰ ਉਸ ਦੀ ਗਲੀ ਵਿੱਚੋਂ ਲੰਘ ਚੁੱਕੇ ਸਨ, ਜਿਸ ਤੋਂ ਬਾਅਦ ਉਸ ਨੇ ਆਪਣਾ ਵਾਹਨ ਵਾਪਸ ਸੜਕ ‘ਤੇ ਖੜ੍ਹਾ ਕਰ ਦਿੱਤਾ। ਕੁਝ ਸਮੇਂ ਬਾਅਦ ਉਸ ਨੂੰ ਟਿਕਟ ਮਿਲ ਗਈ। ਨਗਰ ਨਿਗਮ ਦੇ ਨਿਯਮਾਂ ਮੁਤਾਬਕ ਸਵੇਰੇ 8 ਵਜੇ ਤੋਂ ਸ਼ਾਮ 4 ਵਜੇ ਤੱਕ ਪਾਰਕਿੰਗ ਪਾਬੰਦੀ ਲਾਗੂ ਰਹਿੰਦੀ ਹੈ, ਭਾਵੇਂ ਸਫ਼ਾਈ ਦਾ ਕੰਮ ਪਹਿਲਾਂ ਹੀ ਮੁਕੰਮਲ ਹੋ ਗਿਆ ਹੋਵੇ। ਮੈਕਡੂਗਲ ਦਾ ਕਹਿਣਾ ਹੈ ਕਿ ਨਿਵਾਸੀਆਂ ਲਈ ਅੱਠ ਘੰਟੇ ਤੱਕ ਵਾਹਨ ਹੋਰ ਕਿਤੇ ਖੜ੍ਹਾ ਕਰਨਾ ਅਮਲੀ ਤੌਰ ‘ਤੇ ਮੁਸ਼ਕਲ ਹੈ। ਵਾਰਡ ਕੌਂਸਲਰ ਡੈਨ ਮੈਕਲੀਨ ਨੇ ਮਾਮਲੇ ਨੂੰ ਸਮਝਣ ਦੀ ਗੱਲ ਕਹਿੰਦਿਆਂ ਦੱਸਿਆ ਕਿ ਨਿਯਮਾਂ ਵਿੱਚ ਕੁਝ ਲਚਕ ਲਿਆਉਣ ਦੀ ਸੰਭਾਵਨਾ ਦੀ ਜਾਂਚ ਕੀਤੀ ਜਾ ਸਕਦੀ ਹੈ। ਇਸ ਮਾਮਲੇ ਨੇ ਸ਼ਹਿਰ ਵਿੱਚ ਪਾਰਕਿੰਗ ਨੀਤੀਆਂ ਬਾਰੇ ਨਵੀਂ ਚਰਚਾ ਛੇੜ ਦਿੱਤੀ ਹੈ।
