ਕੈਲਗਰੀ, 27 ਜੂਨ (ਦੇਸ ਪੰਜਾਬ ਟਾਈਮਜ਼): ਕੈਲਗਰੀ ਸਿਟੀ ਕੌਂਸਲਰਾਂ ਵੱਲੋਂ ਮੰਗਲਵਾਰ ਨੂੰ ਸਟੈਂਪੀਡ ਦੌਰਾਨ ਦੇਰ ਰਾਤ ਦੇ ਸ਼ੋਰ ਦੇ ਪੱਧਰਾਂ ਬਾਰੇ ਇੱਕ ਹੰਗਾਮੀ ਬਹਿਸ ਕੀਤੀ ਗਈ। ਵਾਰਡ 1 ਦੀ ਕੌਂਸਲਰ ਕਿਮ ਟਾਇਰਸ ਨੇ ਮੰਗਲਵਾਰ ਨੂੰ ਕੌਂਸਲ ਵਿੱਚ ਕਾਉਬੁਆਏਜ਼ ਅਤੇ ਬੈਡਲੈਂਡਜ਼ ਟੈਂਟਾਂ ਵਰਗੇ ਸੰਗੀਤ ਸਥਾਨਾਂ ਉੱਤੇ ਸ਼ੋਰ ਦੀਆਂ ਸੀਮਾਵਾਂ ਨੂੰ ਉਲਟਾਉਣ ਲਈ ਇੱਕ ਮਤਾ ਪੇਸ਼ ਕੀਤਾ ਸੀ। ਇਹ ਮਤਾ 6 ਦੇ ਮੁਕਾਬਲੇ 9 ਵੋਟਾਂ ਨਾਲ ਹਾਰ ਗਿਆ। ਇਸ ਦਾ ਮਤਲਬ ਹੈ ਕਿ ਬਾਹਰੀ ਤਿਉਹਾਰਾਂ ਉੱਤੇ ਕਲਾਕਾਰਾਂ ਲਈ ਆਵਾਜ਼ ਦੇ ਪੱਧਰ ਨੂੰ ਘਟਾਉਣ ਅਤੇ ਹਫ਼ਤੇ ਦੇ ਦਿਨਾਂ ਵਿੱਚ ਰਾਤ 12 ਵਜੇ ਅਤੇ ਸ਼ਨੀਵਾਰ-ਐਤਵਾਰ ਨੂੰ ਰਾਤ 1:30 ਵਜੇ ਪ੍ਰੋਗਰਾਮ ਬੰਦ ਕਰਨ ਦੇ ਨਿਯਮ ਲਾਗੂ ਰਹਿਣਗੇ। ਕੌਂਸਲ ਨੇ ਹਫ਼ਤੇ ਦੇ ਦਿਨਾਂ ਵਿੱਚ ਕੂਲ-ਡਾਊਨ ਦੇ ਸਮੇਂ ਨੂੰ ਰਾਤ 12:30 ਵਜੇ ਤੋਂ ਵਧਾ ਕੇ ਰਾਤ 1 ਵਜੇ ਕਰਨ ਉੱਤੇ ਸਹਿਮਤੀ ਪ੍ਰਗਟਾਈ ਹੈ ਤਾਂ ਜੋ ਦਰਸ਼ਕ ਆਰਾਮ ਨਾਲ ਬਾਹਰ ਆ ਸਕਣ। ਨਵੇਂ ਨਿਯਮਾਂ ਤਹਿਤ ਸੰਗੀਤ ਸਮਾਰੋਹਾਂ ਦੌਰਾਨ ਮਨਜ਼ੂਰਸ਼ੁਦਾ ਡੈਸੀਬਲ ਪੱਧਰ ਨੂੰ 5 ਤੱਕ ਘਟਾ ਦਿੱਤਾ ਗਿਆ ਹੈ। ਪਿਛਲੇ ਸਾਲ ਸਟੈਂਪੀਡ ਦੌਰਾਨ ਸ਼ੋਰ ਦੀਆਂ 220 ਤੋਂ ਜ਼ਿਆਦਾ ਸ਼ਿਕਾਇਤਾਂ ਆਈਆਂ ਸਨ ਜਿਨ੍ਹਾਂ ਵਿੱਚੋਂ 125 ਸਿਰਫ਼ ਕਾਉਬੁਆਏਜ਼ ਮਿਊਜ਼ਿਕ ਫੈਸਟੀਵਲ ਨਾਲ ਸਬੰਧਤ ਸਨ। ਮੇਅਰ ਜੇਰੋਮੀ ਫਾਰਕਸ ਨੇ ਕਿਹਾ ਕਿ ਹਜ਼ਾਰਾਂ ਕੈਲਗਰੀ ਵਾਸੀਆਂ ਨੇ ਆਪਣੀਆਂ ਚਿੰਤਾਵਾਂ ਉਠਾਈਆਂ ਸਨ ਅਤੇ ਸ਼ਹਿਰ ਨੇ ਪੈਸੇ ਦੀ ਬਜਾਏ ਲੋਕਾਂ ਦੀ ਗੱਲ ਸੁਣਨ ਦੀ ਚੋਣ ਕੀਤੀ ਹੈ। ਪ੍ਰੀਮੀਅਰ ਡੈਨੀਏਲ ਸਮਿਥ ਅਤੇ ਕਾਉਬੁਆਏਜ਼ ਮਿਊਜ਼ਿਕ ਫੈਸਟੀਵਲ ਦੇ ਪ੍ਰਬੰਧਕਾਂ ਨੇ ਬਹਿਸ ਤੋਂ ਬਾਅਦ ਜਾਰੀ ਬਿਆਨਾਂ ਵਿੱਚ ਕਿਹਾ ਕਿ ਉਹ ਹੰਗਾਮੀ ਬਹਿਸ ਹੋਣ ਅਤੇ ਸ਼ਹਿਰ ਵੱਲੋਂ ਕੂਲ-ਡਾਊਨ ਸਮਾਂ ਵਧਾਉਣ ਦੇ ਫੈਸਲੇ ਤੋਂ ਉਤਸ਼ਾਹਿਤ ਹਨ। ਕੈਲਗਰੀ ਸਟੈਂਪੀਡ ਨੂੰ ਇਨ੍ਹਾਂ ਨਿਯਮਾਂ ਤੋਂ ਛੋਟ ਪ੍ਰਾਪਤ ਹੈ ਅਤੇ ਇਹ ਬਾਹਰੀ ਸਮਾਗਮਾਂ ਦੀਆਂ ਤਬਦੀਲੀਆਂ ਤੋਂ ਪ੍ਰਭਾਵਿਤ ਨਹੀਂ ਹੋਵੇਗਾ।
