ਕੈਨੇਡਾ ਵਿੱਚ 14 ਸਾਲ ਚੱਲੀ ਬ੍ਰੈੱਡ ਦੀ ਕੀਮਤ ਫਿਕਸਿੰਗ ਦੇ ਵਿਵਾਦ ਦਾ ਹੋਇਆ ਨਿਪਟਾਰਾ, ਮਿਲਿਆ 500 ਮਿਲੀਅਨ ਡਾਲਰ ਦਾ ਮੁਆਵਜ਼ਾ

ਕੈਲਗਰੀ, 15 ਮਈ (ਦੇਸ ਪੰਜਾਬ ਟਾਈਮਜ਼):
ਕੈਨੇਡਾ ਵਿੱਚ ਬ੍ਰੈੱਡ ਦੀਆਂ ਕੀਮਤਾਂ ਨੂੰ ਗੈਰ-ਕਾਨੂੰਨੀ ਤਰੀਕੇ ਨਾਲ ਨਿਰਧਾਰਿਤ ਕਰਨ ਦੇ ਮਾਮਲੇ ਵਿੱਚ ਹੋਏ 500 ਮਿਲੀਅਨ ਡਾਲਰ ਦੇ ਸਮਝੌਤੇ ਤੋਂ ਬਾਅਦ, ਦਾਅਵਾ ਕਰਤਾਵਾਂ ਨੂੰ ਮੁਆਵਜ਼ੇ ਦੀ ਰਾਸ਼ੀ ਮਿਲਣੀ ਸ਼ੁਰੂ ਹੋ ਗਈ ਹੈ। ਸਾਲ 2024 ਵਿੱਚ ਹੋਏ ਇਸ ਸਮਝੌਤੇ ਤਹਿਤ ਲੋਬਲਾਅ ਅਤੇ ਜਾਰਜ ਵੈਸਟਨ ਲਿਮਟਿਡ ਵੱਲੋਂ 404 ਮਿਲੀਅਨ ਡਾਲਰ ਦਿੱਤੇ ਜਾ ਰਹੇ ਹਨ, ਜਦਕਿ ਬਾਕੀ 96 ਮਿਲੀਅਨ ਡਾਲਰ ਗਿਫਟ ਕਾਰਡ ਪ੍ਰੋਗਰਾਮ ਰਾਹੀਂ ਦਿੱਤੇ ਗਏ ਹਨ।
ਅਧਿਕਾਰਤ ਵੈੱਬਸਾਈਟ ਅਨੁਸਾਰ, ਜਿਨ੍ਹਾਂ ਗਾਹਕਾਂ ਨੇ ਲੋਬਲਾਅ ਕਾਰਡ ਪ੍ਰੋਗਰਾਮ ਵਿੱਚ ਹਿੱਸਾ ਨਹੀਂ ਲਿਆ ਸੀ, ਉਨ੍ਹਾਂ ਨੂੰ 49.11 ਡਾਲਰ ਮਿਲਣਗੇ ਅਤੇ ਬਾਕੀ ਮੈਂਬਰਾਂ ਨੂੰ 24.11 ਡਾਲਰ ਦਿੱਤੇ ਜਾਣਗੇ। ਚੈੱਕ ਰਾਹੀਂ ਭੁਗਤਾਨ ਲੈਣ ਵਾਲਿਆਂ ਦੀ ਰਾਸ਼ੀ ਵਿੱਚੋਂ 2 ਡਾਲਰ ਦੀ ਕਟੌਤੀ ਕੀਤੀ ਜਾਵੇਗੀ। ਦਾਅਵੇ ਜਮ੍ਹਾਂ ਕਰਵਾਉਣ ਦੀ ਆਖਰੀ ਮਿਤੀ 12 ਦਸੰਬਰ 2025 ਸੀ। ਇਸ ਮੁਆਵਜ਼ੇ ਦੇ ਯੋਗ ਉਹ ਲੋਕ ਸਨ ਜਿਨ੍ਹਾਂ ਨੇ ਜਨਵਰੀ 2001 ਤੋਂ ਦਸੰਬਰ 2021 ਦਰਮਿਆਨ ਘਰੇਲੂ ਵਰਤੋਂ ਲਈ ਬ੍ਰੈੱਡ ਖਰੀਦੀ ਸੀ।
ਇਸ ਮਾਮਲੇ ਵਿੱਚ ਮੈਟਰੋ, ਸੋਬੇਜ਼ ਅਤੇ ਵਾਲਮਾਰਟ ਵਰਗੀਆਂ ਕੰਪਨੀਆਂ ‘ਤੇ ਵੀ 14 ਸਾਲਾਂ ਤੱਕ ਕੀਮਤਾਂ ਵਿੱਚ ਨਕਲੀ ਵਾਧਾ ਕਰਨ ਦੇ ਦੋਸ਼ ਲੱਗੇ ਸਨ। ਕੰਪੀਟੀਸ਼ਨ ਬਿਊਰੋ ਨੇ ਸਾਲ 2016 ਵਿੱਚ ਇਸ ਦੀ ਜਾਂਚ ਸ਼ੁਰੂ ਕੀਤੀ ਸੀ, ਜਿਸ ਤੋਂ ਬਾਅਦ ਕੈਨੇਡਾ ਬ੍ਰੈੱਡ ਨੂੰ 50 ਮਿਲੀਅਨ ਡਾਲਰ ਦਾ ਜੁਰਮਾਨਾ ਵੀ ਕੀਤਾ ਗਿਆ ਸੀ।